ठाणे – मनसेला पुन्हा जाग आली असून मराठीचा मुद्दा पुन्हा हाती घेतल्याचे दिसत आहे. कल्याणातील इंग्रजी पाट्या असणाऱ्या दुकानांना मनसेने काळे फासत आपला विरोध व्यक्त केला. दुकानदारांना दोन दिवसाचे अलटीमेटम दिले असून मराठी पाट्या न लावल्यास आणखी उग्र आंदोलन छेडण्याचा इशारा दिला आहे.
गेल्या काही महिन्यात कल्याणच्या शिवाजी चौक परिसरात अनेक नविन दुकाने सुरू झाली आहेत. तर अनेक दुकानदारांनी नूतनीकरण केले आहे. मात्र या दुकानदारांनी आपल्या दुकानाच्या नावाच्या पाट्या केवळ इंग्रजीमध्ये लावल्या होत्या. नेमका हाच मुद्दा कल्याण शहर मनसेने हाती घेत ज्या दुकानांवर इंग्रजी पाट्या होत्या त्यांना काळे फासत आपला निषेध व्यक्त केला. येथील शिवाजी चौक ते मोहम्मद अली चौक परिसरात असणाऱ्या विविध दुकानांच्या पाट्यांना काळे फासत 2 दिवसाचे अलटिमेटम दिले आहे. यावेळी काही दुकानांवर इंग्रजीबरोबरच मराठी पाट्या असतानाही त्यांना काळे फासल्याचे दिसून आले.
दरम्यान, कल्याण शहर मनसेला मराठीच्या मुद्द्याला अचानक कशी काय जाग आली असा प्रश्न नागरिक उपस्थित होते.
या आंदोलनात प्रदेश उपाध्यक्ष काका मांडले, माजी आमदार प्रकाश भोईर, कल्याण शहराध्यक्ष कौस्तुभ देसाई, महिला आघाडीच्या शीतल विखणकर, स्मिता खरे यांच्यासह अनेक नगरसेवक, पदाधिकारी आणि कार्यकर्ते उपस्थित करत होते.
COMMENTS