आता मतदानानंतर मिळणार पोचपावती

नवी दिल्ली-  ईव्हीएम घोळाच्या तक्रारी झाल्यानंतर आता नव्या इलेक्‍ट्रॉनिक वोटिंग मशीन्सची खरेदी होणार आहे. त्यासाठी 3 हजार 174 कोटी रुपये केंद्रीय मंत्रिमंडळाने मंजूर केले आहेत. निवडणूक आयोगाच्या या प्रस्तावाला आज केंद्रीय मंत्रिमंडळाने मान्यता दिली.
2019 च्या लोकसभा निवडणुकीत या नव्या मशीन्सचा वापर होणार आहे. या नव्या ईव्हीएममुळे मतदारांना मतदान केल्यानंतर पावती मिळणार आहे. त्यामुळे ईव्हीएम मशीनविषयीच्या शंका दूर होतील असा निवडणूक आयोगाचा दावा आहे. लोकसभा निवडणुकीआधी व्होटर व्हेरिफिएबल पेपर ऑडिट ट्रेल (व्हीव्हीपीएट) मशीन खरेदी करणे अत्यावश्‍यक असल्याचे पत्र निवडणूक आयोगाने केंद्र सरकारला लिहिले होते. ईव्हीएमसोबत व्हीव्हीपीएट मशीन असणे अनिवार्य आहे असे आदेश सर्वोच्च न्यायालयाने दिला आहे. त्यानुसार कायदा मंत्रालयाने व्हीव्हीपीएटची ऑर्डर मंजूर करावी अशी मागणी मुख्य निवडणूक आयुक्त नसीम झैदी यांनी केली होती. अखेर केंद्रीय मंत्रिमंडळानं निवडणूक आयोगाची ही मागणी मान्य केली आहे. त्यामुळे आता मतदारांना बोटावरील शाईसोबत पावतीही मिळणार आहे.