सिद्धू दिवसा मंत्रालयात तर रात्री कॉमेडी शोमध्ये दिसणार

पंजाबचे नवनिर्वाचित कॅबिनेट मंत्री नवज्योतसिंग सिद्धू आता राजकारणात पुर्णपणे सक्रिय झाले असले तरी त्यांना कॉमेडी शोमध्येही काम करणार आहे.

कोणत्याही परिस्थितीत कॉमेडी शो सोडणार नाही. या शोमुळे मंत्री म्हणून माझ्या कामावर काहीही परिणाम होणार नाही. हवं तर रात्री कॉमेडी शोचे रेकॉर्डींग करेन आणि दिवसा माझ्या कार्यालयात येऊन जनतेची सेवा करेन. हे सगळं मॅनेज करणं तारेवरची कसरत जरूर आहे. पण मी ते करेन, असं सांगतानाच जीव तोडून पंजाबची सेवा करेन. पंजाबच्या प्रगतीला माझे सर्वोच्च प्राधान्य असेल, असेही सिद्धू यांनी सांगितले.

दरम्यान, सिद्धू यांच्या या निर्णयावर त्यांच्याच पक्षातून टीका होऊ लागली आहे. काँग्रेसचे खासदार आणि ज्येष्ठ वकील के.टी.एस. तुलसी यांनी तर सिद्धू यांनी मंत्रीपद किंवा टीव्ही शो दोहोंपैकी एकाची निवड केली पाहिजे, असं म्हटलय. जनतेने तुम्हाला निवडून दिलय. त्यामुळे जनतेच्या भावनांचा आदर केला पाहिजे. जनतेच्या भावनांशी खेळण्याचा तुम्हाला काहीही अधिकार नाही. मंत्री असताना टीव्ही शो केला तर जनताच तुमच्याबाबत प्रश्न निर्माण करतील, असे तुलसी म्हणाले. या मुद्द्यावर सिद्धू यांना न्यायालयात खेचण्याचा विचारही तुलसी करत असल्याचं समजतं.