खड्ड्यावरुन सुप्रिया सुळे आणि चंद्रकांत दादा पाटील यांच्यात ट्विटर वॉर !

राज्याचे बांधकाममंत्री चंद्रकांत दादा पाटील यांनी राज्यातले रस्त्यांवर खडडे दाखवा आणि 1 हजार रुपये मिळवा असं वक्तव्य केलं होतं. त्यानंतर राष्ट्रादीच्या खासदार सुप्रिया सुळे यांनी राज्यभरातील रस्त्यांवर असलेल्या खड्यांविरोधात ट्विटरवर सेल्फी विथ पॉथहोल्स ही मोहीम सुरू केल्यानंतर त्याला सार्वजनिक बांधकाम मंत्री चंद्रकांत पाटील यांनी ट्विटरवरच उत्तर दिलं आहे. सुप्रिया सुळे यांच्या या मोहीमेला उत्तर देण्यासाठी चंद्रकांत पाटील यांनी पॉथहोल मुक्त महाराष्ट्र हा हॅशटॅग वापरून ट्विटरवर उत्तर दिलं आहे. पाटील यांनी केलेल्या ट्विटमध्ये सार्वजनिक बांधकाम विभागाच्या रस्त्यांवरील खड्डे भरण्याचे काम वेगात सुरू असल्याचे म्हटले आहे. याचा पुरावा म्हणून त्यांनी खड्डे बुजवण्याच्या कामाचे चार फोटोही शेअर केले आहेत.

तासगाव, बहादुरी, येवला, नांदगाव, पिलखोड, बहल या रस्त्यांवरील खड्डे बुजवण्याच्या कामाचे हे फोटो आहेत. सुप्रिया सुळे यांनी खड्ड्यासोबत सेल्फी काढून ट्विटरवर सरकारविरोधात जोरदार मोहीम सुरू केली होती,  त्यांच्यानंतर राष्ट्रवादीचे प्रदेशाध्यक्ष सुनील तटकरे आणि इतर नेत्यांनीही खड्ड्यासोबत सेल्फी काढून ते ट्विटरवर शेअर केले होते. आता सरकारकडून विरोधकांच्या या मोहीमेला ट्विटरवरूनच उत्तर देण्यासाठी स्वतः सार्वजनिक बांधकाम मंत्री चंद्रकांत पाटील सरसावले आहेत. त्यामुळे खड्ड्यांवरून सुरू असलेले राजकारण आता सोशल मिडियावर गाजणार आहे.