‘राजमुद्रे’चा गैरवापर करून मताचा जोगवा आम्ही मागू देणार नाही, मनसेच्या झेंड्याला संभाजी ब्रिगेडचा विरोध !

पुणे – मनसेच्या झेंड्यावर राजमुद्रा छापण्यास संभाजी ब्रिगेडनं तीव्र विरोध केला आहे. यावर राज ठाकरे व महाराष्ट्र नवनिर्माण सेनेविरोधात ‘सहाय्यक पोलीस आयुक्त, स्वारगेट, पुणे’ यांच्याकडे ‘संभाजी ब्रिगेड’ च्या वतीने तक्रार दाखल करण्यात आली आहे. यावेळी तक्रार देताना संभाजी ब्रिगेडचे जिल्हाध्यक्ष संतोष शिंदे नगर जिल्हाध्यक्ष टिळक भोस, पुणे जिल्हा सचिव महादेव मातेरे, सुमेध गायकवाड गायकवाड, पी. आर. गायकवाड, शुभांगी ओहाळ, साहिल गायकवाड, शोभा गायकवाड, गायकवाड आदी पदाधिकारी उपस्थित होते.

दरम्यान महाराष्ट्र नवनिर्माण सेनेचा मूळ पहिला झेंडा हा चार रंगाचा होता. जातीच्या नावावर मतं मागण्यासाठी वेगवेगळ्या रंगाचा वापर केला गेला. परंतु त्यांना यश आलं नाही. राजकारणात चढ उतार होत असतात परंतु मतासाठी जाती – धर्माचा उपयोग करून झेंड्याचा रंग सुध्दा (सरड्यासारखे) सतत बदलतात, असे ‘रंग’ राजकारणात बदलता येत नाही. मनसेने आता नवीन ‘भगवा झेंडा’ निर्माण करून त्यावर ‘राजमुद्रा’ छापलेली आहे. छत्रपती शिवाजी महाराजांची ‘राजमुद्रा’ ही राजकारण करण्याचे साधन नाही. छत्रपती शिवाजी महाराजांनी स्वराज्यासाठी राजमुद्रेची निर्मिती केलेली आहे. त्या राजमुद्रेचा वापर कुठल्याही पक्षांनी राजकारण करण्यासाठी करू नये. अशी संभाजी ब्रिगेड ची स्पष्ट भूमिका आहे. म्हणून मनसेच्या झेंड्यावर राजमुद्रा छापण्यास तीव्र विरोध असल्याचं संभाजी ब्रिगेडनं म्हटलं आहे.

मनसेचे अध्यक्ष मा. राजसाहेब ठाकरे यांनी समतेचा भगवा झेंडा घेतला असेल तर स्वागत करू…! आम्ही भारतीय संविधान व लोकशाही मानणारे व्यक्ती आहोत. परंतु ‘राजमुद्रा’ वापरणं हे महाराष्ट्रातील शिवप्रेमी व संभाजी ब्रिगेड सहन करणार नाही. भगवा झेंडा हा समता, समता आणि बंधुतेचा प्रतीक असून तथागत बुध्द, छत्रपती शिवाजी महाराज, संत तुकाराम महाराज शांतीचे सुद्धा प्रतीक आहे. तेच त्यांनी स्वीकारावं, त्यांनी नी हिंदुत्वाची झालंर पांघरु नये. पहिल्या मूळ झेंड्यात जातीचे रंग वापरले गेले..,? आता या जातीच्या रंगाचा मनसे करणार काय…? हा प्रश्न महाराष्ट्र समोर पडलेला आहे. देशाचे व राज्याचे निवडणूक आयोग छत्रपती यांचे वंशज व महाराष्ट्र सरकार यांच्याकडेही या झेंड्या विरोधात व झेंड्या वरील राजमुद्रेविरोधात संभाजी ब्रिगेड तक्रार करणार आहे. राज्यकारभाराची निशाणी आहे ती झेंड्यावर मनसेला वापरता येणार नाही अशी संभाजी ब्रिगेडची ठाम भूमिका आहे. यासाठी मनसे विरोधात तीव्र संघर्ष करणार असल्याचही संभाजी ब्रिगेडनं म्हटलं आहे.