लोणावळा – लोणावळ्याच्या नगराध्यक्षा सुरेखा जाधव यांच्या घराच्या दरावाजापुढे तिरडीचा उतारा आढळून आला. अंधश्रद्धेचा कळस गाठणारी ही घटना असून संपूर्ण शहरात चर्चेचा विषय बनली आहे.
सुरेखा जाधव यांच्या मृत्यूचा काळ, वेळ, ठिकण आणि कारण निश्चित करून तसेच मृत्यू यंत्र आणि काळ्या बाहुलीची बांधलेली तिरडी याचा उतारा खुद्द त्यांच्याच घराच्या दरावाजापुढे आढळून आला. ही रविवार (दि.16) सकाळी घटना उघडकीस आली.
सुरेखा जाधव या त्यांच्या सहकारी नगरसेवकाच्या मुलाच्या लग्नाला उपस्थित राहण्यासाठी सध्या केरळ या ठिकाणी गेले असता. त्यांच्या अनुपस्थितीत त्यांच्या घरासमोर असा घृणास्पद आणि अंधश्रद्धेला खतपाणी घालणारा प्रकार घडला आहे. सदर उताऱ्यात एका कागदावर सुरेखा जाधव यांच्या नावाचा उल्लेख असणारे एक मृत्यू यंत्र रेखाटण्यात आलेले आहे. त्यावर जाधव यांच्या मृत्यूची दिनांक, वेळ, ठिकाण आणि कारण या सर्वांचा उल्लेख करण्यात आला आहे. मंगळवारी (दि. 25 एप्रिल 2017) सकाळी 11 वाजून 8 मिनिट या वेळेवर तुंगारली येथील नगरपरिषद कार्यालयात जाधव यांचा अटॅकने मृत्यू होणार असल्याचे स्पष्टपणे लिहिण्यात आले आहे.
लोणावळा पोलिसांना याची माहिती दिल्यानंतर त्यांनी हा उतारा त्याठिकाणावरून हटवला आहे. याबाबत जाधव यांच्यासोबत भ्रमणध्वनीवर संपर्क साधला असता त्यांनी आपला या असल्या अंधश्रद्धांवर अजिबात विश्वास नसल्याचे सांगितले. परंतु असल्या अंधश्रद्धा पसरविणाऱ्या आणि समाजात वाईट गोष्टींचा पायंडा घालण्याचा प्रयत्न करणाऱ्या समाजकंटकांचा शोध घेऊन त्यांच्या विरोधात कडक पोलीस कारवाई करण्यात यावी, अशी प्रतिक्रिया त्यांनी दिली.
COMMENTS