नितेश राणेंनी मत्स्य आयुक्तांच्या अंगावर फेकले मासे

सिंधुदुर्ग – कॉंग्रेस आमदार नितेश राणे यांनी सहाय्यक मत्स्य आयुक्तांवर चक्क मासे फेकले. मच्छिमारांच्या विविध प्रश्नांचा जाब विचारण्यासाठी गेलेले नितेश राणे यांनी सहाय्यक मत्स्य आयुक्तांवर थेट मासे फेकले. हा सगळा प्रकार कॅमेऱ्यात कैद झाला आहे.

नितेश राणे यांनी मच्छिमारांच्या प्रश्नांबाबत जाब विचारण्यासाठी सहाय्यक मत्स्य आयुक्त जिल्हा कार्यालय मालवण येथे भेट दिली. यावेळी राणे यांच्यासोबत आलेल्या मच्छिमारांनी थेट आयुक्तांच्या टेबलवर माशांची टोपली ओतली. यावेळी आयुक्तांसोबत चर्चा सुरू असताना, त्यांनी योग्य उत्तरं न दिल्याने चिडलेल्या नितेश राणे यांनी थेट त्यांच्या अंगावर मासे फेकले.

तुम्ही तुमची कामं नीट करत नाहीत, जनतेचे प्रश्न सोडवत नाहीत, पैसे खाता, त्यामुळेच आम्हाला इथं यावं लागतं, असं म्हणत नितेश राणे यांनी अधिकाऱ्यांना झापलं.