राज्य शासकीय व इतर पात्र कर्मचाऱ्यांच्या महागाई भत्त्यात 4 टक्के वाढ – सुधीर मुनगंटीवार

राज्य शासकीय व इतर पात्र कर्मचाऱ्यांना मंजूर करण्यात येणाऱ्या महागाई भत्त्याचा दर १३२ वरून १३६ इतका करण्यात आला  असून यासंबंधीचा शासननिर्णय वित्त विभागाने आज दि. २१ सप्टेंबर २०१७ रोजी निर्गमित केला आहे अशी माहिती वित्त मंत्री सुधीर मुनगंटीवार यांनी दिली.

महागाई भत्त्याची रक्कम दि. १ ऑगस्ट २०१७ पासून रोखीने देण्यात येणार आहे तर १ जानेवारी २०१७ ते ३१ जुलै २०१७ या सात महिन्यांच्या कालावधीतील थकबाकीबाबत स्वतंत्रपणे आदेश निर्गमित करण्यात येतील असेही या शासननिर्णयात नमूद करण्यात आले आहे. महागाई भत्त्याची रक्कम प्रदान करण्यासंदर्भातील विद्यमान तरतूदी व कार्यपद्धती आहे तशीच यापुढेही चालू राहील तसेच हे आदेश सुधारित वेतनसंरचनेत वेतन अनुज्ञेय असलेल्या संस्थांमधील कर्मचाऱ्यांना योग्य त्या फेरफारासह लागू राहतील. हा शासन निर्णय महाराष्ट्र शासनाच्या www.maharashtra.gov.in   या संकेतस्थळावर उपलब्ध असून त्याचा सांकेतांक २०१७०९२११४०१३६३३०५  असा आहे.