राज्यात ‘या’ ठिकाणी होत आहे नगरपालिका, नगरपंचायतींसाठी आज मतदान

मुंबई – राज्यातील काही नगरपालिका आणि नगरपरिषदांसाठी आज मतदान सुरु आहे. यामध्ये डहाणू, जव्हार या नगरपरिषदेसाठी तर नंदुरबारमधील तळोदा या नगरपालिकेसाठी हे मतदान होत आहे. नंदुरबार जिल्ह्यातील तळोदा नगरपालिकेत १८ जागांसाठी मतदान सुरु आहे. या निवडणूकीत ३५ मतदान केंद्रावर एकूण २६ हजार ५६२ मतदार आपला हक्क बजावत आहेत.

तसेच पालघर जिल्ह्यातील डहाणू, जव्हार या नगरपंचायतींसाठी देखील आज मतदान घेतलं जात असून जव्हार नगरपरिषदेत मतदानासाठी १५ केंद्राची उभारणी केली आहे. तर डहाणू नगरपरिषदेत एकूण 25 जागांसाठी मतदान घेतलं जात आहे. या तिन्ही ठिकाणची मतमोजणी उद्या होणार आहे.

या नगरपरिषदा आणि नगरपालिकेत 13 डिसेंबरऐवजी 17 डिसेंबरला मतदान घेण्याचा निर्णय निवडणूक आयोगानं घेतला होता. या नगरपरिषदांच्या नामनिर्देशनपत्रांसदंर्भातील न्यायालयांचे निकाल आणि संबंधित अधिनियमातील तरतुदी लक्षात घेऊन हा बदल करण्यात आला होता. त्याचबरोबर खोपोली नगरपरिषदेच्या प्रभाग क्र.6-अ च्या रिक्त पदाच्या पोटनिवडणुकीसाठीदेखील आज मतदान घेतलं जात आहे.